Sumqayıt şəhərində 1988-ci il təvəllüdlü Vüsal şəxsi münasibətlər zəminində yaranan mübahisə zamanı keçmiş həyat yoldaşı Səbinəyə (adlar şərtidir – red.) xəsarət yetirib.
Demokrat.az-ın əldə etdiyi xəbərə görə, hadisə 5-ci mikrorayon ərazisində yerləşən "Şaurma" restoranının yaxınlığında baş verib.
Vüsal orada şəxsi münasibətlərin pozulması zəminində baş verən mübahisə zamanı bıçaqla zərərçəkən şəxsin sağ əl nahiyəsinə bir dəfə qəsdlə vurub.
Hadisəni törədən şəxsin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən təqsirləndirilən şəxs ona elan olunan ittiham üzrə özünü təqsirli bilib. O, ifadəsində göstərib ki, Səbinə onun keçmiş həyat yoldaşıdır:
"Biz 2012-ci ildə ailə həyatı qurmuşuq və 6 övladımız var. 2024-cü ildə isə rəsmi şəkildə ayrıldıq. Boşandıqdan sonra tez-tez övladlarımı görmək üçün onun yaşadığı ünvana gedirdim. Son günlərdə övladlarıma görə onunla barışmaq istəmişəm. Buna görə zərərçəkmiş şəxs ilə mübahisələrimiz olub".
Təqsirləndirilən şəxs qeyd edib ki, hadisə günü, təxminən saat 23:00-da 5-ci mikrorayon ərazisində yerləşən "Şaurma" restoranının yaxınlığında Səbinəyə yaxınlaşaraq barışmaq istədiyini bildirib:
"Lakin üzərimə qışqıraraq təkidlə barışmayacağını dedi və aramızda mübahisə yarandı. Bu zaman şalvarımın arxa cibində saxladığım, meyvə doğramaq üçün istifadə etdiyim bıçaqla onu qorxutmaq istədim. Həmin vaxt zərərçəkmiş şəxs bıçağın tiyəsindən yapışdı, onu burmağa çalışdı. Bıçağı özümə tərəf çəkməyə çalışdım. Bu zaman bıçaq onun əlini kəsdi. Dərhal zərərçəkmiş şəxsə kömək edərək yaxınlıqda olan aptekdən bint alaraq onun əlini sarıdım və evə apardım. Sonradan onun məndən polisə şikayət etdiyini öyrəndim".
Bu cinayət işinə Sumqayıt Şəhər Məhkəməsində baxılıb. Məhkəmədə məlum olub ki, təqsirləndirilən şəxs zərərçəkmişlə barışıb. Həmçinin zərərçəkən keçmiş həyat yoldaşını bağışladığını, ona qarşı şikayətini geri götürdüyünü deyib.
Bu səbəbdən hakim təqsirləndirilən şəxsin barəsində olan cinayət təqibinə xitam verib. O, cinayət məsuliyyətindən azad edilib.
