Sumqayıtlı Vətən Müharibəsi Qəhrəmanı - şəhid polkovnik-leytenant Anar Şükürovun anım günüdür.
Sumqayit24.az xəbər verir ki, Azərbaycan Silahlı Qüvvələrinin polkovnik-leytenantı, "Həmlə" Taborunun Komandiri olan Anar Mehman oğlu Şükürov 20 yanvar 1977-ci ildə Sumqayıt şəhərində anadan olub.
O, uzun illər Xüsusi Təyinatlı Qüvvələrin "N" saylı hərbi hissəsində Qrup Komandiri və Tabor Komandiri vəzifələrində, daha sonra isə Naxçıvan Əlahiddə Ümumqoşun Ordusunun sıralarında xidmət edib və müharibədən bir neçə il əvvəl Naxçıvan Əlahiddə Ümumqoşun Ordusunun sıralarından ehtiyata buraxılıb.
Anar Şükürov İkinci Qarabağ müharibəsinin ilk günündən Binəqədi Rayon Hərbi Komissarlığına dəfələrlə müraciət etsə də, Komissarlıqdan ona hələ gözləməli olduğu bildirilib. Bundan sonra o, 1-ci Ordu Korpusunun rəhbərliyinə müraciət edib və Ordu Korpusunun Komandanlığının yardımı ilə "Həmlə" Taborunun Komandiri olaraq döyüşlərə cəlb olunub. Anar Şükürov Vətən müharibəsi zamanı Suqovuşan istiqamətində gedən döyüşlərdə şücaət göstərib və strateji əhəmiyyətə malik 530 yüksəkliyi uğrunda gedən şiddətli döyüşlər zamanı 16 oktyabr tarixində qəhrəmancasına şəhid olub.
Anar Şükürov göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra "Vətən uğrunda", "Suqovuşanın azad olunmasına görə" və "Vətən Müharibəsi Qəhrəmanı" medalları ilə təltif edilib.
